मेरी कोटधार : टोलग है इक कामगारां रा गौंअ, विधायक बीरूए रा मशहूर गौंअ,
कर्नल जसवन्त सिंह चन्देल,
कलोल, बिलासपुर।
मेरी कोटधार
बडसरा ते चलदी मेरी कोटधार, उतरा – पछमां खा सोला सिंगी धार, निग्गे गौओ रा नौंअ है नघियार, बच्छरेटूए नौण मंदर दुकाना चार, रौंणका लगी रैहंदिया हर एतवार, इक बार जांगे ता जांगे बार-बार ।
शहीद मंगल जमया था बच्छरेटूए, दिती थी कुर्बानी कश्मीरा इनी बेटुए, अगे पुजी जाणा रिखिए रे गौं, रिखिया रहया विधायक इस गौं, मशहूर कोली राजपूत अगले गौं, पुराणी बड़ खड़ी बड़ोटिया गौँआँ।
अबिया जमया बेड़िया चेयरमैन, लाके रा सुधार किता तां लई चैन, टीहरीया पोहलो पहलवान बलवान, कदी नी हारया था मशहूर पहलवान, लदेहा था जगन्ननाथ इक विद्वान नअ सीते शास्त्रीए चमकाया एथी रा नाँअ ।
गाँअ डूडियां लम्बड़दारां रा गौंअ, भैरों, कीमत, सुरतान, गोहडू शिवनन्द पहचान, कर्नल मेजर सिपाही बड़े-बड़े कप्तान, सन्नखे गब्बरू इस गाँओ री पहचान, सनक्खी कुड़ियां है इस गाँओ री जान, ऐरयां-गैरयां री कडी दिंदियां जान।
टोलग है इक कामगारां रा गौंअ विधायक बीरूए रा मशहूर गौंअ, अगे जाई कै मशहूर बुहाड़ गौंअ, बुहाड़ी रे कुटाल थे एथी रे राणे, पाण्डव ऐथी कियां आए रब्ब जाणे, कियां जीती ये धार राजा बीरचन्द जाणे ।
बुहाड़ी ते अगे कोट गौंअ बसदा, अगे चिमलुए गुग्गा वीर बसदा, चिमनू था कदी इस गौंआं रा दादा, ददरेड़े ते चिक नंदी पूरा किता बादा, तां बया गुग्गे रा मंदर अगे नी जाणंदा, लगदे मेले एथी इतना की जाणदा ।
ककरैड़ दोस्तो कोटधारा रा आखीरी गौंअ, इस गाँवा पर रैंदी सारयां देवतयां री छाँव, ककरैड़ा ते दिसदे वार-पार सारे गौंअ,
फेरी अगे पुजदे बबखाला पुलारिया थौं, मारदा था बाग सतलुजा रे वार-पार छाल, बवखाला रा दूजा नौंअ तांई पया बागछाल ।
धारा रे पूरबा कने पछमां भरया गोबिन्दसागर, ताई कोटधार लगदी दोस्तो श्रीलंका दाखल, बड़ी तरक्की किती इसे धारें अजा तक, स्कूल- अस्पताल-सड़कां पूजियां क्हरां तक, लिखणे जो तां बड़ा कुछ बाकी है जसवन्ता जियूंदे रहो सारे कोटधारिए एही अऊं गलांदा।